Beiras pide "unidade" nun "proxecto común de autodeterminación"

O ex portavoz nacional do BNG cre "indispensable" volver "articular todas as lecturas diferentes" na organización nacionalista.

O ex portavoz nacional do BNG e líder do Encontro Irmandiño, Xosé Manuel Beiras, proclamou este domingo que é "indispensable" recuperar "o modelo de articulación de todas as lecturas diferentes dun proxecto común", co obxectivo de sumar "e non restar, nin dividir, nin monopolizar a ideoloxía do nacionalismo". "Debería ser para a unidade, pero neste momento non hai unidade, é indispensable recuperar o modelo de articulación de todas as lecturas diferentes dun proxecto común de autodeterminación", asegurou o histórico nacionalista en declaracións a Europa Press durante a súa participación na manifestación do Bloque con motivo do Día da Patria Galega.

Beiras advertiu de que a articulación de "todas as lecturas" foi a "clave do éxito do ascenso imparable" da formación nacionalista galega nos últimos 25 anos --con el, o BNG alcanzou o seu teito electoral no Parlamento autonómico--. Para o líder do Encontro Irmandiño, corrente crítica no seo do Bloque, este domingo é un "día de festa e reivindicación", pero avisou de que "o que pasa, é que a xente que vén (pola manifestación) é a que ten conciencia de identidade da nación galega". "E aí hai un espectro que excede o esquema organizativo actual do BNG", apostilou, en declaracións a Europa Press, o histórico nacionalista.

"NIN RESTAR, NIN DIVIDIR"

"¡Claro!, non se pode restar, non se pode dividir nin monopolizar a ideoloxía do nacionalismo", recalcou para criticar "a escisión dos mundos, entre os que fan lecturas correctas e os que non", en referencia ás distintas posturas das correntes integradas no Bloque. Beiras, que se situou cara ao final da manifestación, afirmou que "desde hai bastantes anos, sempre se colocou "no medio da xente". "É onde me gustou estar sempre e onde seguín estando na época en que era portavoz nacional e do grupo parlamentario", salientou. "Desde hai bastantes anos estou sempre no medio da xente, sempre estaba no medio da xente, nos despachos para facer o indispensable que había que facer", defendeu o histórico dirixente do Bloque, quen advirte do reto de combater "o proceso de fascisfización" da sociedade actual e do "proceso de ofensiva ás identidades dos pobos".

http://www.xornal.com/artigo/2010/07/25/politica/beiras-pide-unidade-nun-proxecto-comun-autodeterminacion/2010072517332700156.html